عرفتي انك حامل 💖
أول 3 شهور لازم متتحركيش زياده ويكون في راحه
لازم تاخدي فوليك أسيد يوميا
الغثيان الدكتور بيكتبلك ليه دوا وبتحاولي تاكلي حاجات خفيفة ومريحه ليكي انتي ودي بتختلف من حد للتاني بس حاولي تاكلي خضار وفاكهه كتير
........
بعد كده الفتره اللي ف النص بتبقى أمان اكتر بيكون حملك ثبت
بتاخدي كالسيوم وحديد ده لازم
بتبدأي تستخدمي كريمات و زيوت للبطن عشان الاسترتش ماركس والتشقق يومياااا كذا مره ف اليوم وده مهم جدا جدا
استخدمي بالمرز بالكاكاو للحوامل و زيت ممكن جونسون أو زيت زيتون براحتك
من الشهر الرابع يوميا وكذا مره ف اليوم بتدهني حلمه الصدر بمرهم مرطب ريفي 2 أو بانثينول عشان لو معملتيش كده هتشوفي ايام سودا ف الرضاعة اهتمممممي
ممكن تعملي يوجا للحوامل أو رياضه خفيفه عشان تحافظي على وزنك
فكره انتي بتاكلي لاتنين دي ودت ناس كتييير ف داهيه
طفلك محتاج كالسيوم وفيتامينات وحديد
اشربي لبن وكلي خضروات ورقية وفواكه ده المهم واكيد بروتين
لكن العك الكتير مش هيفيده وهيتخنك
........
آخر 3 شهور
بتريحي ضهرك فترات أطول وبترفعي رجليكي عشان متورمش
متاكليش حوادق ومخللات زياده وتراقبي وزنك وتراقبي تورم ايدك أو رجلك لو زاد وبتقيسي الضغط باستمرار عشان تنتبهي بعد الشر من تسمم الحمل
كل ما قربتي من الاخر بتزيد زياراتك للدكتور كل 15 يوم وف الآخر خالص كل اسبوع
نقطة مهمة جدا
تهتمي باسنانك جدا وبنضافتها عشان البيبي بياخد من الكالسيوم اللي فيكي
تشربي لبن كويس عشان تعويض
تحاولي تتحركي وتعملي رياضه خفيفة
.........
بنجيب ايه لبس للبيبي؟
الفكره هنا أن الموضوع نسبي كل واحده تجيب حسب مزاجها وامكانياتها
بس عموما هجيب 6 قطع من كل حاجه
6 فانلات نص
6 كت
6 كم
6 بنطلون داخلى
6 أطقم خروج
6 أطقم بيت
بطانيه وبورت وشنطه للبيبي
وطبعا البافتات والشرابات والطاقيه
حاولى تجيبي الفانلات بكباسين أو بتتفتح هتسهل عليكي كتير
البيبرون مهم جداااا تكون من ماركة نضيفه هي والتيتينا زى شيكو وايفينت
لانها بتفرق مع اللثه بتاعه الطفل وكمان بتكون الحلمه فيها بنفس تكنيك وشكل الرضاعه الطبيعيه
تجيبي البيبرون 150 مل
كريم تسلخات البامبرز سودو كريم أو زنك اوليف
وايبس وشامبو وشاور و زيت سانوسان
مفرش مشمع لتغيير البامبرز
المقاسات بتاعه اللبس
شوفي من متابعتك لوزن البيبي مع الدكتور لو وزنه قليل هاتى مقاس صفر
لو وزنه معقول هاتى مقاس 2
خدى بالك لبس مقاس صفر شهر بالظبط وبيترمى وبيضيق
يعني الأكبر أفضل فمتكتريش من الصغير
..............
حاجات المستشفي
بتاخدي شنطتين
شنطه النونو فيها فانلات كت ونص وكم وبناطيل صغيره
طقمين وشراب وطاقيه وجوانتي بافته
بطانيه بيبي تقيله
شامبو وشاور وبامبرز
البيبرون والتيتينا لو بتحبي
وايبس وقطن وسودو كريم وكحول للسره
أغلب الحاجات دى بتكون موجوده ف المستشفي بس احتياطي
دول أساسيات ولو احتجتي حاجه تانى ابقي هاتيها ساعتها من الصيدليه
.....
شنطه المامي
عبايتين وياريت تكون بزراير أو فتحه ف الصدر تقدرى ترضعي منها
روب تقيل ممكن تسقعي من البنج
برا رضاعه وكذا بانتى
فوط صحيه خاصه للولادة وبادز للصدر
مشط وفوطه و شبشب ومزيل عرق
..........
وأخيرا والأهم
مش معنى انك حامل انك تهملي ف نفسك وتبقى شبة رجل الكنبه حاولي تهتمي قد ما صحتك تسمحلك واستمتعي بشكل بطنك وهي بتكبر وصوريها كتير
اقري كتير انتي وجوزك_مش انتي بس_ انتي وجوزك عن التربية والحمل والأطفال وعرفي جوزك انه مش ضيف ده هيكون اب ولازم يكون شريك معاكي ع قد ما يقدر
💖
على تعب التجربه فدى معجزه من ربنا
أعظم حاجة ف الوجود
حاولي تقللي الشكوى وتستمتعي بكل لحظة يمكن متتكررش تاني استمتعي بكل لحظه ابنك بيكبر فيها جواكي وبكل خبطه بيخبطهالك وتأملي ف معجزة ربنا انه يخلق روح صغيره جميله من روحين متحابين فيها شبه من كل واحد فيهم شوية
لو خدتيها باستمتاع وتأمل هتنسي تعبها وتشوفي حلاوتها
ليست هناك تعليقات:
إرسال تعليق